Chlätterlager (03. bis 09. Juli 2011) in Sarnen

Am 3. Juli a Morgu am Nini si wer zum 7. Mal ins Chlätterlager gstartut. Iischi Reis het nisch uber di Grimsla gfiärt, wa wer de öi scho iische erschtusch Halt hei gmacht. Bi wunderschönum Wätter hei wer im “Azalea Beach“  iischi erschtusch Bigägnig mit du Felsä gignossu. Namittag si wer de Richtig Sarnu gfahru, wa wer de meh oder weniger diräkt iischers Lagerhüs in Stalden, oberhalb va Sarnu gfunnu hei.

Ufum “Bänkli vorem Hüsli“ hent nisch scho zwei erwartut. Ischi Chuchimannschaft, d’Madlene und der Berni, wa z’Ässu scho bereit hent ka. Wenn alli versammlut sind gsi, hei wer uf d‘ Stephanie angstossu, wa Giburtstag het ka. Nach dum Ässu isch erschti Priorität gsi z’Volleyballnätz üfzstellu. Speter hent de scho bald amal alli iru Bett wellu ga teschtu.

Am zweitu Tag siwer uf Melchsee-Frutt gfahru. Oberhalb vam chleinu See hets schöni Routä ka und öi z’Wätter het mitgspilt. Im Sarnersee si wer nisch de Namittag ga erfrischu und öi a Volleyballmatch het nit tärfu fehlu. Pünktlich zum Ässu si wer de wider duheimu im Lagerhüs gsi. Jedä Abu isch Volleyball und UNO spilu ufum Programm gstannu.

Ufum Suschtupass hei wer am drittu Tag iischi Chlätterfelsä gfunnu. Na du ma ca. 20 minütigu Marsch uber Stock und Stei, hei wer a super Üssicht ka. Aschliässund si wer widär uf Sarnu ga badu. Vor ischer Villa hei wer de a schönä Grillabu ka.

Am viertu Tag si wer nach dra chleinu Rundfahrt durch Seewen ins Chlättergibiät cho. Der Tee im Rucksack het scho fascht widär agfangu siädu und wiär hei gschpirt, dass wirkli Summer isch. Namittag si wer zrug uf Sarnu ins niw Schwimmbad gigangu. Wiä immer hei wer en gmiätliche Abu ka.

Am Donnschtag si wer ins “Beretli“, oberhalb va Meiringu, ga chlättru. Ischä Kolleg vam Schwimmbad Meiringu het Freid ka, dass ischi Gruppa widär amal där Wäg in schis Schwimmbad gfunnu het. Wills am Vorabu äs Gwittär gigä het, si wer de am Fritag amal in d’Halla ga chlättru. Inär “Pilatus Indoor“ hets wirkli ver jedä äs paar schöni Routä ka. Nacher si wer zrug ins Lagerhüs und hei der letschtusch Abu aso richtig gignosso.

Am Samstag is ans Putzu gigangu. Aber ischers Team het öi das super gmeischtrut, will Gross und Chlei der Putzlumpu gschwungu hent. Nacher is heimwärts gigangu. Wiär heis fasch nit chänu glöibu, dass die Wucha scho widär verbi isch. Aber wiär gfröiä nisch scho uf z‘ negscht Jahr. Äs grossus Merci ischu dri Bärgfiährer, dum Kusi, dum Jan und dum Angelo. Schi hent iisch sicher durch d’Wucha gfiährt und iisch widär super Chlättergibiäti gizeigt. Merci öi der Madlene und dum Berni, wa iisch kulinarisch verwännt hent. Wenn wer na dum Chlättru alli hungrigi zrug ins Hüs chumä, si wer immer froh, wenn‘s user Chuchi scho aso fein schmäckt. Merci öi allu Teilnähmer, wa ds Lager durch iru Awäsuheit widär unvergässlich gmacht hent.

SEE YOU NEXT YEAR!!!